Добивај вести на Viber
Со натписите „Јас сум тука“ и „Невидливите се тука“ лекарите застанаа пред министерството за здравство, наместо пред болниците со цел да му покажат на министерот Тодоров дека се видливи и дека штрајкот постои. Велат колку и да затвара очи министерот, штрајкот нема да престане.
Денеска ја сменивме локацијата бидејќи не бевме добро видливи и дојдовме тука за да бидеме подобро видени. Се наоѓаме на оваа страна од улицата, на страната на вистината, науката, здравството и на страната на пациентите. Од другата страна, како што гледате, нема никој – изјави д-р Дејан Ставриќ, претседател на Самостојниот синдикат на клинички центар
За лекарскиот проблем интерес покажале и странските амбасади кои биле изненади од скратувањето на уставното право на лекарите да излезат на штрајк.
Повикани сме од сите странски претставништва само во домашните институции не можеме да влеземе, истакна д-р Ставриќ. Тие се пожалија и дека се зголемуваат притисоците за штрајкот да се задуши, така во Куманово директорот барал да бидат фотографирани сите лекари кои ќе излезат на протест.
Сеуште се примаат само итните случаи, а закажаните се презакажуваат по завршувањето на протестот. Бројот на интервенции и операции е намален. Наместо 60 на скопската гинекологија за четири дена направена е само една операција, на клиниката за анестезиологија извршени се 9 интервенции, а на очната клиника за три дена направени се 15 операции.
Министерот Тодоров сеуште стои на својот став дека плата по учинок е добар проект, а за денешниот протест нема што да додаде.Тој вчера му објаснуваше на премиерот дека имало непрецизност со плаќањето по учинок но дека работите се средуваат
„Имаше определни нејаснотии, некогаш можеби и намерни погрешни внесови, но како поминува времето и како ние апелираме се повеќе се намалува тој грешен внес“, – вели министерот за здравство Никола Тодоров.
Од синдикатот велат дека и наредните денови штрајкот ќе продолжи, како пред министерството така и пред Владата. Покрај клиничкиот центар во Скопје, протестираат и клиничките болници од Тетово, Штип и Куманово.
Мартина Проковиќ