Левица со кривична пријава против Џафери, Османи ги нападна дека не се македонска партија
Објавено во: Македонија 16 Септември, 2022
Министерот за надворешни работи Бујар Османи вели дека неговиот личен став е дека Левица не е македонска партија, туку, како што рече, партија во функција на руската пропаганда за вртење на македонскиот народ против ЕУ и САД. Ваквата реакција следуваше откако Левица најави нова иницијатива за Референдум до Собранието за бугарскиот договор.
-Мислам дека на државата нема да и направат многу штета затоа што има поширок консензус за правците по кои таа се движи, но на народот што го претставуваат може да му направат многу штета обидувајќи се да го свртат против вредностите што ние ги споделуваме. Не треба да паднеме на таа пропаганда која делумно е стимулирана и финансирана и има многу лоши и зли намери, прво кон сопствениот народ, а потоа и кон другите граѓани и кон државата, вели Османи.
Според министерот, Левица ги надминува границите на делување на сметка на иднината на државата и на сметка на иднината на граѓаните.