Добивај вести на Viber
Проектот „Луково Поле“, со кој се предвидува изградба на хидроцентрали во Националниот парк „Маврово“, ќе се најде на следната седница на собраниската Комисија за транспорт и врски, по иницијатива на пратеникот Рејхан Дурмиши од Партијата за европска иднина.
Тој посочи дека проектот е од пошироко значење за регионот, за Македонија и за Албанија, како и за локалното население кое живее по течението на реката Радика, поради што неопходно е да се стави пред пратениците.
До седницата, Министерството за животна средина има обврска да подготви материјали за пратениците и да достави информација до Собранието за ефектите што ќе ги има овој проект врз животната средина.
„Со реализација на проектот ќе дојде до пренсочување на водите од природниот тек на реката. Тоа значи намалување на нивото на Радика, а со тоа и загрозување на животот и живеалиштата на бројни видови цицачи, водоземци и безрбетници. Истовремено демне опасност од згаснување на Радика, што ќе повлече последици кај локалното население кое ќе се соочи со социјално-екомонски и еколошки промени“, смета пратеникот Дурмиши.
Проектот „Луково Поле“ предизвика лавина реакции од еколошките здруженија, активистите и граѓаните кои стравуваат дека со хидроцентралите ќе се загрози еколошката структура и биодиверзитетот во националниот парк. Најсилни се реакциите во соседна Албанија, од каде лично премиерот Еди Рама кај себе ги повика македонските министри за економија и за животна средина за да им каже дека проектот не може да се реализира без согласност од Тирана.
Премиерот Никола Груевски вчера се обиде да ги смири реакциите со изјава дека енергетскиот проект се работи во соработка со Светска банка, а оваа институција нема да дозволи тој да се реализира без претходен елаборат за влијанието врз животната средина.