Македонците меѓу топ 5 странски туристи во Бугарија

Добивај вести на Viber

Македонските туристи се петти по бројност во соседна Бугарија, покажуваат податоците на бугарското министерство за економија. Според нив, Бугарија во 2012 година ја посетиле 400 илјади Македонци. Соседната земја ја посетиле најмногу романски туристи - дури 932 илјади во 2012 година, на второ место се Грците - 928 илјади, на трето Германците - 650 илјади и на четврто Русите - 597 илјади. Вкупно 6,54 милиони туристи од целиот свет ја посетиле Бугарија во 2012 година, но амбицијата на бугарските власти е до 2020 година овој број да стигне до 9 милиони, а до 2030 година - до 12 милиони туристи. Ова го предвидува бугарската Национална стратегија за развој на туризмот, што ја подготви Министерството за економија. Документот предвидува во следните 16 години бугарија да изгради „немасовен“ и „специјализиран“ туризам. Една од основните цели е „хотелите на црноморското крајбрежје да излезат од моделот „ол инклузив“ и да се пренасочат кон концептот на банско-санаториумско лекување, преку поврзување со медицински установи во нивна близина“. Идејата е со овој чекор бугарија да излезе од рамките на сезонскиот туризам и да привлекува гости во текот на целата година. За ваквиот концепт Бугарија се потпира врз стареењето на населението во европските земји. До 2030 година се очекува 20% од населението во Европа да е постаро од 65 години. Со оглед на тоа што дури 63% од гостите во Бугарија доаѓаат од Европа, оваа земја се надева да ги претвори туристичките капацитети во центри за рехабилитација на европските пензионери.