МАКЕДОНЦИТЕ СЕ РЕКОРДЕРИ ВО ПУШЕЊЕ ЦИГАРИ: Oваа навика го намалува апетитот и му штети на организмот

Добивај вести на Viber

Македонците се нација со голем број пушачи. Половина од Македонците кои пушат цигари се млади до 15 години. 45,4 отсто од македонското население се пушачи, а според последните анализи на Аналитика тинк-тенк  12,4  отсто од нив се млади од 13 до 15 години. Нутриционист Ирина Лазарова вели дека пушењето го намалува апетитот и штетно влијае на организмот.

„Пушењето освен што само по себе си носи низа на здравствени ризици, најмногу се поврзува  со проблеми со тежината и сo внес на нездрава храна бидејќи пушачите имаат поголема желба за внес на храна која има висока содржина на масти, како и брза храна. Пушењето го намалува апетитот и го зголемува чувството на ситост во организмот. Никотинот кој е составен дел од цигарите е всушност тој кој влијае на мозокот и на централниот нервен систем и го потиснува апетитот, додека јаглерод моноксидот и катранот како дел од цигарите се оние кои наштетуваат на нашето здравје и може да предизвикаат болести на дишните патишта и срцеви заболувања, па и рак.  При пушење, цигарите емитираат гасови и честички од катран кои се оксиданси и прооксиданси, способни да создадат слободни радикали. Бидејќи витаминот Е, витаминот Ц, Бета каротен и селенот се вклучени активно во клеточна одбрана како антиоксиданси кои влијаат врз уништување на слободните радикали, кај пушачите се јавуваат намалени нивоа на витамин Ц и бета каротен во крвната плазма. Кадмиумот кој исто се наоѓа во цигарите, го намалува дејството на селенот, а кај пушачите освен ова ниски нивоа се јавуваат и на витаминот Е. Нутритивниот статус на пушачите е најчесто послаб заради неадекватната исхрана поради намалениот апетит“, додава нутриционистот.

Вели дека студиите покажале дека пушачите не се хранат со многу овошје и зеленчук, а всушност тоа се најголемите извори на витамин Ц и бета каротен кои се намалуваат во телото при пушење. 

„Пушачите исто имаат повисок ризик од заболување од остеопороза бидејќи се пријавени и ефекти на намалена апсорпција на витамин Д. За да се избориме против ова, потребна е здрава и разновидна исхрана со многу зеленчук и овошје која со намален апетит потешко се внесува. Заклучокот е дека потребно е да се одвикнете од пушењето или барем да го намалите за да може апетитот нормално да функционира“, вели Лазарова.

Анализата покажала дека 30 отсто од младите започнуваат со пушење пред 14-тата година, а 80 отсто од нив не биле спречени кога купувале цигари.

Според истражувањето на тинк-тенк „Аналитика“, преваленцата на пушење во земјата изнесува 48,4 отсто, додека во европските земји е далеку пониска или ЕУ просекот е 29 отсто. Во Шведска преваленцата изнесува 8,7 отсто, а во Грција и Бугарија 27 отсто.

foto freepik.com