Македонија и Албанија ќе преземаат заеднички мерки за заштита на охридската пастрмка

Добивај вести на Viber

Албанија мора да го следи македонскиот пример за обезбедување финансиска поддршка во земјоделството. Двете земји потребно е да ја зголемат размената во земјоделството преку интензивна соработка меѓу надлежните институции и бизнис заедниците од двете земји. Ова се дел од заклучоците од денешната средба меѓу министрите за земјоделство на Македонија и Албанија, Љупчо Димовски и Едмонд Панарити која се одржа во Скопје. Двајцата министри се согласија дека се неопходни засилени мерки за заштитата на охридската пастрмка и за таа цел ќе се спроведуваат ригорозни контроли на риболовот од албанска страна. - Македонија и Албанија во делот на земјоделството немаат отворени прашања, ниту какви било проблеми, но соработката мора да се унапреди зашто размената е многу мала. За таа цел ќе формираме работна група преку која ќе се координираат натамошните институционални активности, рече министерот Димовски на прес-конференција по средбата. Според Димовски, Македонија на албанскиот пазар може да пласира градинарски производи и овошје, а оттаму да увезе морски плодови, лимони, портокали, маслинки и маслиново масло. Министерот Панарити напомена дека Албанија мора да го следи македонскиот пример за обезбедување финансиска поддршка во земјоделството. - Заинтересирани сме за вашите искуства во однос на субвенционирањето и успехот од распределбата на поддршката. Тоа е и една од причините зашто дојдовме, да научиме од вас околу креирањето на политиката на финансиската поддршка и тоа да го примениме во Албанија, посочи Панарити кој пристигна во Македонија со директорката на Платежната агенција на Албанија. Димовски и Панарити по средбата во Министерството за земјоделство заминаа во посета на Платежната агенција каде албанските претставници директно ќе имаат можност да се запознаат со реализирањето на ИПАРД средствата и државната поддршка.