„Македонија лек“ се пријави на тендер за вакцини, но не и на оној за МПР
Објавено во: Македонија 05 Февруари, 2019
„Македонија лек“, компанијата која е под истрага по скандалот со декларациите на вакцините против морбили, перотит и рубеола, кои беа повлечени откако се најдоа погрешни декларации со поминат рок, ќе учествува на милионскиот тендер за набавка од страна на Министерство за здравство, објави Телма.,
На вчерашното отворање на постапката за набавка на вакцини од 10 милиони евра за вакцини за наредните две години се пријавиле вкупно пет оператори, а еден од нив е и „Македонија лек“.Преостанатите понуди се оние на Елбиор, д-р Пановски, Феникс фарма и Алкалоид конс.
Сепак „Македонија лек“ нема да учествува во набавката на МПР вакцините, каде што се пријавени единствено Феникс фарм и Алкалоид конс. Директорот на Бирото за лекови веќе најави дека по истрагата оваа компанија може да биде суспендирана на следниот распишан тендер.
Основното јавно обвинителство Скопје побара спорните вакцини да не се уништуваат, како што првично беше планирано, туку побара да му се достават, откако отвори предмет по допрен глас во врска со евентуални неправилности при увозот, дистрибуцијата и употребата во периодот од крајот на 2018 и почетокот на 2019 година.
На последниот тендер државата купи вакцини само од две фирми Македонија лек и Елбиор.