Добивај вести на Viber
За првите три месеци профитот е 33 отсто од приходите од продажба
„Македонијатурист“ оствари профит од 22,4 милиони денари во првиот квартал годинава, покажуваат официјалните податоци од билансот за успех што ги објави таа компанија. Во споредба со истиот период лани добивката е повисока за 32 отсто, а најголемата скопска угостителско-хотелиерска компанија бележи и порас на приходите од продажба за 12 отсто.
„Македонијатурист“ во првиот квартал лани имаше најлош финансиски резултат во низа од 2010 година. Воедно годинава, за првите три месеци, таа компанија ја прекина негативната серија од четири години од 2010 до 2014 година во која бележеше постојан пад на приходите од продажба. Сега за периодот јануари-март „Македонијатурист“ оствари приход од продажба во износ од 68,1 милиони денари (над 1,1 милиони евра) и тоа е повисок приход за 7,1 милиони денари односно 12 отсто во однос на реализацијата од минатата година.
Оперативните расходи на хотелско-угостителската компанија изнесуваат 56,85 милиони денари и се на исто ниво од истиот период лани, додека приходите од продажба пораснале за 12 отсто. Овој параметар укажува на заклучок дека компанијата ги зголемила бројот на ноќевања и се зголемила искористеноста на сместувачко-угостителските капацитети во однос на истиот период лани. Оперативната добивка изнесува 15,3 милиони денари. На тоа се додадаваат и финансиските приходи на оваа компанија, позната по тоа што поседува значајни количества ликвидни средства во деловни банки во земјава, кои за првите три месеци изнесуваат 9,9 милиони денари и се за 2,3 милиони денари пониски од лани. Од оперативната добивка и од финансиските приходи компанијата достигна до финансиски резултат од 22,4 милиони денари добивка за првиот квартал годинава што е зголемување на нето добивката за 5 милиони денари или 32 отсто во споредба со истиот интервал лани.
Р.Ф.