Македонската бирократија остана со куси ракави!

Добивај вести на Viber

И дефинитивно администрацијата во земјава годинава нема да го добие ветеното и најавено зголемување на платите за 5 отсто. Собраниското мнозинство ги изгласа измените на Законот за исплата на платите, со кои зголемувањето се одложува за една година. Законот се носеше по скратена постапка и предизвика жестока собраниска дебата на релација власт-опозиција. Пратениците од СДСМ обвинија дека со ова четврто одложување на покачувањето на платите, власта манипулира. “Владата четврти пат го одложува покачувањето на вработените во јавната администрација со образложение дека во услови на економска криза не може да се зголемат платите. До годинава требаше покачувањето да биде 10 проценти како што најавуваше Владата “ - рече Маријанчо Николов од СДСМ и праша дали ќе нема петто одложување на платите во јавната администрација.

Пратениците од владеачкото мнозинство измените на Законот за исплата на плати, ги бранеа со европската криза.

“Наместо да критикувате ред е да кажете дека откако е оваа влада на власт имаше покачување на платите. Просечната нето плата во Македонија е зголемена за 61 процент, нето платата во 2006 година изнесуваше 12.600 денари, а во 2010 година достигна 20.303 денари. Платите во јавниот сектор во 2007 и 2008 година беа зголемени 10 отсто“ – рече Ѓорѓи Коџобашиев, додавајќи дека Владата ќе продолжи со покачување на платите на граѓаните.

На повисоки плати, админитративците ќе може да се надеваат во декември 2013 та година. Премерот Никола Груевски неодамна порача дека во време на криза нема да има откази во јавната администрација.

„Многу е веројатно дека Македонија во 2013-та година ќе биде единствена или една од ретките земји во Европа која во вакви услови ќе изнајде начин да ги зголеми пензиите на пензионерите и социјалните надоместоци на лицата приматели на социјални помошти “ – изјави  премиерот. Засега нема отстапка од најавата за мартовско зголемување на пензиите за 5% и уште дополнителни 2% поради порамнување со стапката на инфлација.