Добивај вести на Viber
Авионска опрема, чоколади, текстил - неколку македонски компании се заинтересирани извозот на овие производи да го прошират на францускиот пазар. Стопанската комора на Македонија и Амбасадата на Франција во Скопје започнаа иницијатива за зголемување на економската и трговската размена меѓу двете земји.
Компанијата "Микросам" е заинтересирана за соработка со француски компании и за пласман на производи во авионската и вселенската индустрија, а фабриката за кондиторски производи "Европа“ сака да се поврзе со големите синџири маркети во Франција.
Амбасадорката Лоренс Оер посочи дека македонските компании имаат производи кои можат без големи проблеми да се најдат на францускиот пазар.
„Имате уникатни работи кои се интересни за француските потрошувачи. Еве, на пример, јас во мојот куфер кога одам во Франција го носам вашето чоколадо со брусница. Бадемите се ваш производ. Ги носам и крзнените влечки изработени во „Димко Митрев“ од Велес, но и мед“, рече амбасадорката Оер.
Трговската размена меѓу македонската и француската економија стагнира последните 10 години, со постојан дефицит на македонска страна. Лани достигна извоз од Македонија од 25 милиони долари, а увоз од 94 милиони долари. Директните странски инвестиции од Франција во Македонија во последните десет години изнесуваат 140 милиони евра.