Македонските уметници во трка за четири милиони денари?!

Добивај вести на Viber

За збогатување на музејските збирки во „Музејот на современа уметност“ и „Националната галерија“, Владата ќе издвои четири милиони денари за откуп на дела од ликовни уметници.

Македонските уметници наредната година ќе можат да се јават на јавен конкурс кој ќе го распише Министерството за култура.

Со овој чекор на Министерството за култура и Владата имаат за цел да ги унапредат состојбите во ликовнат уметност, кои генерално се лоши.

„Со откупот на ликовните дела ќе се зголеми ликовниот фонд, ќе се стимулира творештвото, ќе се создаваат дела за градење на историскиот континуитет. Истовреме ќе се покаже грижа за културното наследство и ќе се трасира развојот на творештвото. Ова е начин за подобрување на состојбите во ликовната уметност, а откупот на делата ќе ги стимулира авторите за поголемо и поквалитетно творештво,“ истакна министерката за култура Елизабета Канческа-Милевска.

Таа додаде дека ликовната дејност е значаен сегмент од заложбите на Минстерството за култура со што и до сега се издвојуваше финансиска помош за докажани автори.

Оттаму соопштуваат дека ќе се откупуваат дела од уметници кои учествувале на значајни групни изложби во земјата и странство, потоа дела кои се застапени во значајни светски публикации, млади уметници со истакнат ликовен израз.

Делата ќе бидат селектирани од Комисија во координација со Министерството за култура.

Уметникот Александар Станковски потенцираше дека државата во последните три децении ништо нема сторено на ова поле и затоа постои празнина во збирките на дела од современа уметност во период од 30 години и тоа во време кога нашата уметност се издигна на светско ниво.

„Приватните колекционери кои и во минатото беа во незначителен број, денес речиси и не постојат. Купувањето на дела поради економската криза денес е сведено на нула. Овој гест е како да му дадете вода на прежеднет човек. Стимулација и надеж за уметниците кои до сега твореле ентузијастички и од свои средства се финансисрале.Тоа е чиста голгота која многу добро ја познавам,“ изјави Станковски.

Од Министерството изразија надеж дека со овој потег можеби ќе се поттикнат и другите институции кои имаат приватни збирки, да го зголемат својот опус на дела и да купуваат од македонските ликовни уметници.