Македонските вина во светот ќе се продаваат како „Повардарски“?!

Добивај вести на Viber

Географска ознака ќе добијат македонските вина до крајот на 2013 година. Според најавите Македонија ќе почне да извезува вина со заштитено потекло „Повардарски“, ознака која наскоро треба да се регистрира во земјава и во ЕУ. Како што изјави денеска претседателот на Здружението за заштита на географската ознака „Повардарски“, Владислав Попов, процесот на создавање и спецификација на критериумите за производот „Повардарски“ е завршена, а сега следи нејзиното регистрирање. Познавачите на оваа индустрија сметаат дека географската ознака ќе има големо значење за земјава која ќе биде предводник за овој процес во другите региони и индустрии. „Претстои уште многу работа, но ако сме обединити како винари можеме да успееме во таа цел“, изјави Попов. Со него се согласи и експертот за вино од ФАО, Фредерик Џулиа и истакна дека искуството покажало оти земјите коишто користат географски одредници за извозните производи имаат поголем бенифит, како  од аспект на подобрување на квалитетот, така и во делот на постигнување поголема додадена вредност на призводот. „Примерот на регионот Рона во Франција и на Тоскана во Италија се доказ дека ваквиот начин на работа, кој е комплициран, но вреден, може да даде големи економски резултати“, истакна Фредерик Џулиа и додаде дека со новата ознака ќе нема проблеми при пласманот на вино во Европа. Во меѓувреме и натаму ќе продолжи употребата на терминот „Вина од Македонија“ и произведено во Македонија.