Македонското млеко не ги задоволува европските стандарди

Добивај вести на Viber

Мора да се подобри квалитетот на македонското млеко, советуваат француските експерти, а тоа ќе се постигне со подобра хигиена во фармите на повисоко ниво и употреба на избалансирана храна за добитокот. Иако немаат увид во целото производство, Ричард Деминк од француската организација „Авди“ посочи дека од она што го виделе во Македонија, може да се констатира дека македонското млеко не ги задоволува стандардите, но и преработувачите не се грижат многу за неговиот квалитет. „Во Франција, ако некој производител три месеци не произведува квалитетно млеко, од него веќе никој не купува и тој веќе не може да се занимава со дејноста“, забележа Деминк кој додаде дека француските искуства покажале дека соодветната законска регулатива може многу да ги подобри работите. Покрај француските, на трибината насловена„Подобрување на квалитетот на млеко“ учествуваа и македонски експерти. За професорот од Факултетот за земјоделство и храна, Владимир Какуринов, сега најважно е да се работи на подобрување на хигиената. „Хигиената на фармите може да се подобри без големи вложувања, со примена на добри земјоделски практики. Фармерите веќе сфаќаат колку е битно бројот на микроорганизми да се сведе на минимум“, посочи Какуринов.