„Макпетрол“ организира „Крени глас“ работилници за родителите од Охрид и од Струга

Добивај вести на Viber

Работилници против врсничко насилство наменети за родители ќе се одржат во Струга и во Охрид, во рамки на општествено одговорната кампања на „Макпетрол“. Утре, 4 јуни, со почеток во 18 часот, ваква едукативна средба ќе се случува во струшкото основно училиште „Јосип Броз Тито“. Задутре, 5 јуни, исто така, со почеток во 18 часот, „Крени глас“ работилница ќе се одвива во охридското основно училиште „Григор Прличев“. На двете едукативни средби, родителите ќе имаат можност да разговараат со психологот Деспина Стојановска, а водител ќе биде актерот Сашко Коцев.

Овие работилници ќе бидат 16 и 17 по ред што „Макпетрол“ ги овозможува за родителите во рамки на општествено одговорната кампања „Крени глас против врсничко насилство“. За булингот се дискутираше во општините Гази Баба, Гевгелија (со Валандово, Дојран и со Ново Село), Илинден и Петровец, Бутел и Чучер-Сандево, како и во Битола, Ѓорче Петров, Кавадарци (со Демир Капија), Крива Паланка. Вакви едукативни средби се одржаа и во Штип, каде што учествуваа граѓани и од Свети Николе, потоа и во Кисела Вода, Карпош, Аеродром, Центар, Куманово, како и во Кочани, на која присуствуваа и граѓани од Виница и од Берово.

Преку работилниците, родителите добиваат простор за подобро да се запознаат со најразличните аспекти на проблемот со врсничкото насилство, и особено, со начините на кои што тој влијае врз развојот на децата. Меѓу темите за кои што се дискутира се и препознавањето на случаите со булинг, но и пристапот што треба да се примени во нивното разрешување. Освен за стручниот аспект, родителите со психологот можат да разговараат и доколку имале лично искуство со овој проблем. Дел од средбите се и претставници на стручните служби на училиштата во општината, кои при случаи на врсничко насилство работат со учениците.

„Макпетрол“потпиша меморандуми за соработка со 26 општини кои што се приклучија и ги поддржаа активностите од општествено одговорната кампања. Во првата фаза од „Крени глас против врсничко насилство“ беа организирани работилници за ученици во повеќе од 150 основни училишта. Централен дел на кампањата е интернет-страницата kreniglas.mk. Оваа веб-платформа содржи многу информации, едукативни материјали, како и можност за анонимно споделување лични приказни поврзани со булингот.

Општествената одговорност е еден од најзначајните стратешки приоритети на „Макпетрол“, на чија што реализација компанијата посветено работи низ годините. Кампањата „Крени глас против врсничко насилство“ има за цел да поттикне дискусија и да го зголеми интересот во јавноста за проблемот со булингот.„Макпетрол“ и во иднина ќе работи на планот на општествената одговорност, а голем дел од овие активности и натаму ќе биде посветен на младите.