„Макпетрол“ со загуба од 955 илјади евра во 2012 година

Добивај вести на Viber

Нафтената компанија „Макпетрол“ 2012 година ја заврши со пад на приходите од продажба за 1% и загуба од скоро еден милион евра. Според неревидираниот и неконсолидираниот финансиски извештај на компанијата објавен на Македонската берза вкупните продажби на „Макпетрол“ лани се намалиле за 1% и изнесуваат вкупно 24,4 милијарди денари или околу 400 милиони евра. При тоа на домашниот пазар е забележана пад на продажбата исто така за 1% на вкупно 391 милиони евра, додека продажбата на странски пазари бележи пад од 22% на вкупно 449 милиони денари или 7,3 милиони евра. Нафтената компанија во исто време успеала да ги намали расходите од работењето за 1%, што најмногу се должи на помалите трошоци за потрошени материјали, ситен инвентар за 69% како и трошоците за вработените кои се намалиле за 11%. Голем раст на трошоците минатата година „Макпетрол“ бележи кај расходи по основ на камати и курсни разлики кои се зголемиле за 68%, што на крај резултира со тоа „Макпетрол“ годината да ја заврши со загуба од 955 илјади евра, односно 58,9 милиони денари. Само да потсетиме нафтената компанија 2011 година ја заврши со профит од 418 илјади евра.