МАЛИТЕ ХЕРОИ ЌЕ ИМААТ МНОГУ ПОДОБРИ МОЖНОСТИ ВО НИВНАТА БОРБА: Целосно е реновирано одделението за онкологија на Клиниката за детски болести

Добивај вести на Viber

По повеќемесечни активности денеска официјално заврши реновирањето на Одделението за онкологија на Клиниката за детски болести во Скопје. Ова е еден од најзначајните проекти кој е реализиран со донација од компанијата „Макстил“, а уште при потпишувањето на Меморандумот, лани во мај, беше посочено дека најмладите пациентчиња, кои се борат со најлошата болест ќе имаат подобри и подостоинствени услови за престој додека трае нивното оздравување, као и подобри услови на нивните родители кои се на Клиниката со нивните деца и воопшто, за целиот персонал кој се грижи за нивното оздравување.

„Сакам од срце да им се заблагодарам на нашите партнери од „Макстил“, кои извршија огромна инвестиција, колку материјална, толку и хумана. Нашите мали пациенти, или како што ние обожаваме да ги викнеме Херои, ќе имаат многу подобри можности во нивната борба, а моите колешки и колеги од Одделот за онкологија идеални услови за работа, бидејќи колку да се трудиме, колку и да дадеме несебичен придонес, технологијата има огромно  значение. Благодарност и до Владата за се што прави за нашата клиника и за здравството во целина, бидејќи кога јавниот и приватниот сектор дејствуваат заедно резултатите се неизбежни. Апелирам ваквиот пример на „Макстил“ да биде следен и од другите компании, се со цел, Клиниката за детски болести да биде што по опремена и нашите деца да се лекуваат кај нас, а не во соседството, нагласи денеска директорката на Клиниката за детски болести, проф. д-р Аспазија Софијанова.

Според неа, со реноваторските активности не само што целосно е променет изгледот на одделението, туку и се зголемени капацитетите и значително се подобрени условите за лекување и давање третмани на пациентите.

„Помошта од „Макстил“ со секоја нова донација е се поголема и позначајна. По целосното реновирање на одделот за неонатологија, што, исто така беше голема и значајна донација, како и донирањето на ехо апаратот, ова е веќе трета вредна донација од Макстил за Детска клиника, а и најголема воопшто во здравството кај нас и овој факт покажува вистинска грижа и активен однос на една компанија кон сериозен и реален придонес и помош за јавното здравство, што всушност е бенефит за сите граѓани. Нашата улога во третирањето на младите пациенти, како универзитетска клиника е најголема како најекспертска инстанца, што сега со подобрување и зголемување на капацитетите се зголемува а верувам и резултатите што ќе ги постигнеме, истакна Софијанова.

На претставувањето на највредната донација во здравство досега, беа присутни и премиерот Димитар Ковачевски и министерот за здравство Беким Сали

„Иницијатива како оваа од „Макстил“, како деловен субјект да донираат на Клиника што е од суштинско значање за онколошката нега и третман на младите пациенти е повеќе од општетствено одговорно. Зборува за вистинска свесност на една компанија, за својата улога и функција во општеството и заедницата. Примерот на „Макстил“ уверува и дава надеж во свесноста и мотивот на овој сектор да помогнат во јавното здравство кои и покрај врвните специјалисти и нивната експертиза што ја ставаат во функција на пациентите се сеуште предизвик каде сечија помош и интервенција е добредојдена, истакна Беким Сали.

За донаторот целосното реновирање на овој оддел е одговор на потребите за обезбедување современа и безбедна средина за лекување на пациентите кои имаат потреба од онколошки третман.

„Колку и да сакаме овој оддел никогаш да не треба да се употреби, реалноста сепак ни кажува дека и најмалите пациенти заболуваат од онколошки болести и оттука одлуката на Одборот на директори на „Макстил“ да помогне во реновирањето, вели Димитар Цветковски, претседател на Одборот на директори на „Макстил“.

Инаку, во декември 2020 година „Макстил” заедно со неговите волонтери го заврши целосното реновирање на Одделението за неонатологија кој е единствен таков оддел, а беше обезбедена и дополнителна опрема и апаратура.

Анита Буховски

Фото Вангел Тануровски