Марјановиќ: Пропаст на договорот со Грција ќе значи изолација за земјата и поделби
Објавено во: Македонија 04 Октомври, 2018
Еден од најафирмираните професори по кривично право Ѓорѓи Марјановиќ во ТВ колумна за емисијата Фактор магазин вели дека ако не успеат уставните измени во Собранието, тогаш единствено решение се нови избори, додавајќи дека резултатите од овој консултативен референдум упатуваат на тоа дека и на нови предвремени избори расположението на населението ќе биде исто.
„Всушност, во моментов, во Македонија се кристализирани 2 опции. Едната е за Европска Македонија, (со широка поддршка од најзначајните и најмоќните политичари во светот), со јасни насоки земјата да влезе во друштвото на современите демократии каде што има ред и поредок, почитување на законите и владеење на правото и другата опција е опцијата за зачувување на уставното име. Всушност, продолжување на оној глупав акроним ПЈРМ од кој на сите ни се крева косата на глава. За жал, освен зачувување на уставното име, оваа опција не и нуди никаква јасна перспектива на Македонија. Напротив, би рекол дека може целосно да ја изолира земјата и да ја втурне во бран од несакани сценарија на поделби, социјални немири, итн.
Пензионираниот професор од Правниот факултет во ексклузивна ТВ колумна за емисијата Фактор магазин оценува дека олитичарите во Македонија имаат статус на недопирливи . Според Марјановиќ за да се врати вербата на обичниот граѓанин во правната држава, потребно е секој политичар кој се огрешил пред законите да одговара.
„Како професор по кривично право секогаш сум се залагал за почитување на законите. Ако се прифати амнестијата за сите злодела што ги направија претходните носители на власта (а нашиот Претседател како да милува повторно да ја применува), со тоа само се охрабруваат неговите миленици, (кои би требало да одговараат пред судовите) – за нови злодела“. Спиралата на злото веќе еднаш мора да ја прекинеме, во спротивно, со неказнивост, ризикуваме да влеземе во еден маѓепсан круг од кој после никогаш нема да успееме да излеземе“, дециден е Марјановиќ.
Постреферендумски согледување на проф. Марјановиќ ќе можете да ги видите во вечерашното издание на емисијата Фактор магазин на ТВ24 во која соговорници на Горазд Чомовски му се универзитетските професори Ненад Марковиќ, Александар Спасеновски и докторантот по политички науки Борјан Ѓузелов.
Г.Ч.