МАСКИТЕ ЗАДОЛЖИТЕЛНИ: Kризниот штаб во Куманово ги снабди приватните здравствени установи со опрема

Добивај вести на Viber

Oпштинскиот штаб за заштита и спасување од Куманово денеска обезбеди и достави 100 пакети со заштитни маски, средства за дезинфекција и заштитна облека, наменети за приватните здравствени установи во Куманово.

Од денес во Куманово, Тетово и Прилеп, е задолжително носењето на заштитни маски, со цел да се спречи ширењето на Ковид 19, вирус кој зема сериозен замав во Куманово. Ваква одлука донесе Владата.

„Има маски, ракавици, мантили за лекарите. Кај нас работата се одвива тековно, доаѓаат пациенти и нема некои посериозни промени во нашето работење откако се појави коронавирусот. Нам маските ни се потребни, и мораме да ги носиме за да ги заштитиме пациентите. Не се знае кој се може да биде заразен. Оваа донација е добра затоа што нема да мораме сами да купуваме опрема. Дневно кај мене во ординација поминуваат по 35 пациенти, но имало и денови кога доаѓале по 60 или дури и 80 пациенти. На градоначалникот му посакуваме брзо оздравување“, вели Фатмир Асани од Здружението на матични лекари Куманово.

Деновиве пред неколку банки од кризниот штаб делеа маски на граѓаните.

Граѓаните прво ќе бидат опоменати, а потоа ќе следат и парични казни, за кои засега не е прецизирано колку ќе изнесуваат.

Освен маска, дозволено е граѓаните да носат марама или шал, кои ќе им ги покриваат носот и устата.

Овие денови во аптеките, масовно се купуваат заштитни маски.

„Најмногу се бараат маски. Граѓаните купуваат маски, по 3,4,5 парчиња, зависно од тоа колку членови се од семејството“, велат од кумановска аптека.

Куманово има над 340 потврдени случаи на Ковид 19.

14 кумановци ја изгубија битката со коронавирусот.

Позитивен на Ковид 19 е и градоначалникот Максим Димитриевски.