Мерко излезе од формална сопственост над Меѓународниот универзитет во Струга

Добивај вести на Viber

Генц Мерко, најстариот син на струшкиот градоначалник Рамиз Мерко,повеќе не е сопственик на Меѓународниот универзитет Струга, кој обезбедува дипломи за високо образование од неколку факултети.

Синот на Мерко од минатиот месец целосно му ја препуштил „Еуро Колеџ 2007“ на партнерот Армен Кадриу, исто бизнисмен од Струга. Инаку „Еуро Колеџ 2007“ е фирма со минимални приходи, но истовремено сопственик на Меѓународен универзитет Струга. Ова правно лице на Кадриу и на Мерко редовно им носи приходи во последните години од околу 750.000 евра годишно и постојана добивка од четврт милион евра.

Генц и Рамиз Мерко, како и другите возрасни членови на семејството, од почетокот на летото се најдоа на т.н. „црна листа“ на САД. Од тогаш партнерот Кадриу тврдеше дека е единствен сопственик на универзитетот, а преку маркетинг соопштенија беа најавувани нови косопственици и отстапување на удели.

Приватниот универзитет беше редовно критикуван од коалиционите партнери од актуелната власт дека е „продавач“ на итни дипломи, каде, како што тврдеа низ годините, преку ноќ, дипломираат идни функционери, но и многумина други кои бараат вработување со високо образование во јавниот сектор.

МУС пред летото доби и акредитација за основање на Факултет за здравствени науки, односно за медицински сестри.Од Министерството за образование тогаш рекоа дека одлуката е донесена поради потреба од повеќе здравствени работници во државата и дека факултетот ќе започне со работа од следната академска година. МУС има акредитација и за Факултет за економски науки, Правен факултет, Факултет за информатички технологии и Факултет за политички науки.

Рамиз Мерко за кратко време нанижа повеќе кривични пријави. Против него во моментов има вкупно девет такви. Последната е за „несовесно работење во службата“, а повеќето се поврзани со одлуки за јавни набавки,дозволи и концесии.

А.К.