Мицкоски: Тупанчески да каже што мисли за предлогот на Алтернатива
Објавено во: Македонија 11 Јануари, 2022
Христијан Мицкоски, лидерот на ВМРО-ДПМНЕ, утринава ги даде првите коментари за составот на новата Влада, односно предложените министри и вицепремиери од страна на мандатарот Димитар Ковачевски.
Мицкоски го повика професорот на Правниот факултет на УКИМ, Никола Тупанчески, предложениот нов министер за правда кој доаѓа на местото на Бојан Маричиќ, да го каже своето мислење за барањето на Алтернатива, новиот коалиционен партнер во Владата, за барањето меѓународна истрага за случаите каде што има сомнежи за политичка импликација како што се Монструм, Алфа, Диво Насеље, Алмир Алиу итн.
„Сега во оваа влада се наоѓаат истите ликови чии политики беа поразени. Го имате Љупчо Николовски кој беше задолжен за антикорупција во времето кога оваа влада на сите скали е на првото место по корупција. Повторно министер е Маричиќ, кој е познат по неправдите и хаосот во правосудството и монтираните случаи кои завршуваат со неспроведување на правдата. Во владата продолжува да биде министер за внатрешни работи Оливер Спасовски, кој е главниот бранител на мафијата и во чие време се случија најголемите скандали поврзани со разни шверцови, пасоши, нерасветлени убиства и слично. Министер е и Битиќи, кој ќе остане запаметен по фијаското во економијата, инфлацијата, високите цени во маркетите, а ниските плати. Од друга страна, имате и невпечатливи министри, чии портфолија кажуваат дека таму се дојдени како чувари на заевизмот и слепи послушници. Министер е и професорот Тупанчески, кој би било добро да го чуеме што мисли како добар правник за главното барање на Алтернатива кое е дел од договорот со СДСМ - за реотворање на случаите Монструм и другите правно утврдени случаи“, коментира претседателот на најголемата опозициска партија за ДВ.