Мицкоски: Владата и Зоран Заев амнестираат криминал и убиства
Објавено во: Македонија 14 Април, 2018
Христијан Мицкоски, претседателот на опозициската ВМРО-ДПМНЕ, реагираше по ослободителната пресуда за тројцата обвинети за убиството на полицајците во Арачиново во 2000 година кои беа први жртви на македонските безбедносни сили пред да започне воениот конфликт, што е уште една контроверзна судска одлука.
„Виновници за тројното убиство во Арачиново нема. Виновници за разнесувањето на џипот на полскиот контингент на НАТО во кумановско, нема. Виновници нема ниту за петкратното убиство кај Смилковско езеро, бидејќи осудените за масакрот во случајот „Монструм“ се на слобода. На слобода се и стотици затвореници и осуденици за криминал кои оваа Влада ги амнестираше. За оние од Диво Насеље се бара меѓународна арбитража. Владата и Зоран Заев амнестираат криминал и убиства, додека политичкиот терор расте.
Несигурноста се враќа по улиците. Правдата кога се заменува со политика, нема правда, но нема и мир. Кога толку многу криминалци се на слобода, а правдата недостижна тогаш е јасно дека најголемите криминалци се во владата. Постизборната платформа на албанските партии потпишана во Тирана, во која се вети слобода за сите овие случаи, како да ја пишувал некој нов Нострадамус упатен во сите овие судски процеси или судовиве сфатија колку многу е "визионерски" документот, па одлучија да го реализираат“ напиша Мицкоски во обраќањето на социјалните мрежи.