МИЦКОСКИ ЗА ИЗЈАВАТА НА РАДЕВ: Ваквите изјави се дел од средниот век, а не од современа Европа
Објавено во: Македонија 26 Јуни, 2024
Maкедонскиот премиер Христијан Мицкоски денеска изјави дека е подготвен да седне на иста маса со бугарскиот претседател Румен Радев и со претседателот на ГЕРБ, Бојко Борисов, и со факти и аргументи да разговара за иднината. Сепак, оцени дека добрососедство не е ако нема меѓусебна почит и ако едната страна е понижена, а другата ликува.
Изјавата на Румен Радев, кој кажа дека се паднати маските и дека новата влада во земјава покажала страв од прифаќање на термините „Бугарин“ и „бугарско“, Мицкоски ги оцени за анахрони и изјави кои се дел од средниот век, а не од современа Европа.
„Јас сум подготвен да седнам и покрај тоа и да разговарам и со едниот и со другиот. Му посакувам на господинот Борисов да ја формира владата во Бугарија бидејќи ние доаѓаме од Европската народна партија и логично е јас да посакувам нашиот источен сосед да има премиер кој доаѓа од истото семејство. Тоа не треба да имате дилема. Но, исто така, мојата порака е дека поминаа времињата кога овде кај нас имаше политичари кои беа сервилни, коишто виткаа кичма, коишто коленичеа, потпишува се и сешто што им беше ставено на маса. Од друга страна во името на европското знаме го ограбуваа народот, ја засрамуваа и понижуваа својата татковина“, рече Мицкоски.
Инаку, претходно од Софија му одговорија на Мицкоски дека нема да има предоговарање на преговарачката рамка.фото Фејсбук/Христијан Мицкоски