Mикробиолози, триатлонци и пијанисти одржаа моќни говори на конференцијата TEDxYouth во меѓународното училиште НОВА

Добивај вести на Viber

Музичарката и единствена Македонка што го има завршена триатлонот „Ајрон мен“, Леана Таќи; микробиологот од Белград, Алексеј Дрино и Брендан Шулц кој има работено во кампања на американскиот претседател Барак Обама, беа дел од говорниците на конференцијата TEDxYouth@NovaSchools која се одржа во саботата во меѓународното училиште НОВА. Настанот се случи за првпат со цел да прерасне во традиционален, а концептот е внимателно одбрани личности од различни сфери на животот да презентираат идеи кои се надвор од конвенционалното размислување, кои инспирираат и нудат едно поинакво гледиште. Моќни говори одржаа и извршната директорка на Младинскиот образовен форум, Дона Костуранова; правникот Иван Кочовски; филмаџиката Ана Јакимска; режисерот и професор Милош Андоновски; ученичката која има искуство со работа во лабараторија, Софија Панева и средношколецот - виртуоз на пијано, Лис Асланај.

Тема на TEDxYouth@NovaSchool беше „Направени во иднината“, а 9-те говорници кои се качија на сцена ги спојува фактот дека се млади, но посветени на различни полиња на работа. Целата конференцијата се одвиваше на англиски јазик и беше снимена, а наскоро на интернет ќе бидат објавени и видеа од сите говори.

- Во ист ден со нашиот настан, во Бруклинскиот музеј во Њујорк се одржа и официјална TEDxYouth конференција која беше на иста тема. За нас, најважниот параметар според кој се водевме при изборот на говорници беше да имаат да споделат нешто инспиративно што ќе ѝ отвори нови хоризонти на публиката како и на луѓето кои потоа ќе ги гледаат видеата на интернет. Се надеваме дека сме успешни во мисијата – велат членовите на организацискиот тим на TEDxYouth@NovaSchools кои воедно се средношколци во училиштето НОВА.

TEDx настаните се одржуваат под лиценца добиена од светски познатата непрофитна организација TED која организира годишни конференции од големи пропорции на која говорници биле еминентни личности како Бил Гејтс, Хилари Клинтон, Ал Гор, Боно и многу други. TEDx настаните се креираат според правила пропишани директно од TED и целта е да се разменат идеи и ставови и на локално ниво.

За присуство на TEDxYouth@NovaSchools сите заинтересирани мора да аплицираат и воедно не се наплаќаа билети. Конференцијата ја поддржаа спонзорите: SONY, Zonta Club of Skopje, Arcuss, Скопска пивара, Singular, Unet Cloud, VERO, Turkish Airlines, 3D Project Studio и асоцијацијата на родители и професори од НОВА.