Министерот за локална самоуправа ќе бара повеќе буџетски пари за регионален развој

Добивај вести на Viber

Министерот за локална самоуправа Тахир Хани денеска имаше работен состанок со раководителите на осумте центри за регионален развој.

Хани се заложи за поинтензивна соработка со цел побрзо решавање на актуелните прашања кои го отежнуваат функционирањето на центрите.

- Ќе се залагам за зголемување на буџетските средства за рамномерен регионален развој, за да може оваа политика да даде резултати, рече министерот.

Директорот на Бирото за регионален развој Џемаил Елмази ја потврди констатацијата дека е неопходно да се воспостави тренд на зголемување на средствата за оваа намена и побара од министерот при евентуален ребаланс на буџетот да не се пристапи кон нивно кратење со што би била доведена во прашање реализацијата на постојните проекти.

Раководителите на центрите изразија задоволство од покажаниот интерес на министерот за нивното функционирање. Ја нагласија потребата од измени на Законот за рамномерен регионален развој со цел да продолжи кофинансирањето на Центрите од страна на Министерството како и во изминатите пет години. Раководителите од министерот побараа поддршка и за наплата на средствата од општините наменети за кофинансирање на Центрите. Воедно се пожалија дека има општини кои и покрај законската обврска досега немаат издвоено ниту денар за кофинансирање од нивното формирање во 2009 година.

Раководителите на Центрите за регионален развој изразија подготвеност да го прошират својот обем на работа преку аплицирање на проекти во програмите и на други министерства, но побараа и да се забрза постапката на одобрување на проектите и распределба на средствата за регионален развој од страна на надлежните органи за да можат центрите во предвидениот рок да ги имплементираат проектите