Министерството за финансии објави Јавен долг 34,1 % од БДП, највисок во последниве 7 години!

Добивај вести на Viber

Јавниот долг на Централната Влада во април достигна ниво од 34,1% од Бруто Домашниот Производ. Најновите податоци на Министерството за финасии покажуваат дека и во април продолжил трендот на пораст на Јавниот Долг.

Во апсолутни бројки, заклучно со април долгот изнесува 2 милијарди и 716 милиони евра, што во однос на март преставува пораст од 13,4 милиони евра.

Со почетокот на оваа година продолжи трендот на пораст на Јавниот Долг, така во однос на декември 2012 та година, за четири месеци задолжувањата се поголеми за 172 милиони евра.

Анализирано од аспект на структурата на Јавниот Долг на Централната Влада, долгот кон странство изнесува 1 милијарда 667 милиони евра а внатрешниот долг 1 милијарда и 48 милиони евра, пришто е регистриран раст на долговите по двата основи.

Бројките укажуваат дека Јаниот Долг од 34 отсто од БДП, измерен во април годинава, претставува највисоко ниво во последните седум години.

Во 2005 та година Јавниот Долг изнесуваше 38% од БДП, но по преземањето на власта од страна на ВМРО ДПМНЕ, во 2007 ма и 2008 ма година се спроведе процес на раздолжување кон странските кредитори и кон меѓународните финансиски институции, поради што долгот беше сведен на 20,6% од БДП во 2008 ма година.

Но, веднаш потоа, темпото на задолжување од година во година продолжи, со што сега се достигна едно од највисоките нивоа.

Дел од експертската јавност укажа дека Македонија го искористи фискалниот простор за натамошни задолжувања, а меѓународните финансиски институции и агенции побара од Владата да усвои Стратегија за управување со Јавен Долг – клучен документ што треба да ги содржи плановите на државата за натамошни задолжувања како и динамиката за раздолжување.

Последната ваква Стратегија беше усвоена во март, 2010 та година, а се однесуваше на периодот 2010 – 2012 та година.

Според тој документ, Владата планирала лани државниот долг да се одржи на ниво не повисоко од 30%. За разлика од овие проекции, ланската 2012 та година заврши со ниво на Јавен Долг на Централна Влада од 33,8%.