МИНИСТЕРСТВОТО ЗА ЗДРАВСТВО ИЗНЕНАДЕНО ОД ИЗЈАВАТА НА ДИМИТРОВ: На седниците го заменуваше државниот секретар, чесно е да каже дека не присуствуваше
Објавено во: Македонија 12 Јануари, 2022
По изјавата на вицепремиерот Никола Димитров дека неговите позиции во Владата „во однос на колегите биле различни на многу теми, како и приодот и мерките против пандемијата, стигна реакција од Министерството за здравство, од каде велат дека се изненадени од непромислената изјава на вицепремиерот Никола Димитров, со која покажува значителна несериозност кон пандемијата на Ковид-19.
„Чесно е Димитров, да каже дека на многу седници на ГККШ или на Владата кога на дневен ред беа токму тие точки, тој не ни присуствуваше, туку на седниците го заменуваше државниот секретар. Кога седниците пак беа „удостоени“ со присуството на вицепремиерот, тој во ниту еден момент не се спротивстави на препораките и на мислењата на стручната лекарска фела која до Владата препорачуваше и советуваше во кои насоки да се движат мерките за заштита од ширење на ковид-19. Димитров, апсолутно го делеше мислењето со колегите. Кризата предизвикана од ширењето на коронавирусот е една од најголемите во модерното време, а тоа бара одговорно однесување и дејствување во сите сегменти на општеството. Од Ковид 19 сите трпиме последици, дури и државите кои имаат најорганизиран систем, затоа е важно како ќе реагира секој поединец и како ќе ја разбере својата улога во општетсвото. Оттука неразбирливи се причините поради кои Димитров истапува во јавноста со вакви ставови“, се наведува во соопштението на Министерството за здравство.