Мираковска: Со географската одредница „Северна“ не се менува идентитетот

Добивај вести на Viber

Пратеничката од НСДП, Соња Мираковска денеска на седница на Комисијата за уставни прашања рече дека улогата како пратеници е да обезбедат подобар живот за граѓаните и за земјата.

Со географската одредница „Северна“ пред Македонија не се менува идентитетот на Македонците, смета таа. 

„Македонците имале еден идентитет без разлика каква додавка имало пред Македонија низ историјата. Идентитетот се состои од комплекс работи што се важни, а за нас како Македонци исклучително важен е македонскиот јазик, кој со договорот е потврден како столб на идентитетот. Потоа, идентитетот го сочинува културата, писмото, музиката“ – рече Мираковски. 

Вели дека пред референдумот требало да се изработи нов избирачки список врз принципот на активна регистрација, затоа што како што вели, многу луѓе се иселени од Македонија. 

На почетокот на седницата, премиерот Зоран Заев го образложи предлогот на Владата. Тој рече дека нема ништо спорно во предлогот за уставни измени и ги повика пратениците да не подлежат на притисоци и да се обединат околу стратешките цели на земјата.

„Со оваа одлука референцата ФИРОМ , ќе ја испратиме во историјата“-кажа Заев и додаде дека со Договорот се заштитува македонскиот идентитет за век и векови, а македонскиот јазик станува признат и од Грција.

Пратеникот од ВМРО ДПМНЕ,  Трајко Вељаноски пак вели дека власта може да продолжи со процесот, но нема да има двотретинско мнозинство за промена на Уставот.

фото Фокус