МНР ја предомисли Бугарија, нема забранет влез за македонските државјани
Објавено во: Македонија 18 Јануари, 2022
Министерството за надворешни работи извести дека успеало да ја предмисли Бугарија и да не го ограничува влезот за сите неесенцијални патувања во земјата (во исклучоците спаѓаат медицински лица, хуманитарни работници, студенти, лица со регулиран престој, делегации и слично) за македонските државјани.
„На сите државјани на Република Северна Македонија од 20 јануари им е дозволен влез во Бугарија со приложување на валиден сертификат за вакцинација против КОВИД 19 или сертификат за прележана болест, заедно со негативен ПЦР тест не постар од 72 часа. За влез на малолетни лица од 12 до 18 години, исто така е задолжителен негативен ПЦР тест“, информира Министерството за надворешни работи.
Од МНР нагласуваат дека по интензивната комуникација меѓу министерствата за надворешни работи на двете земји, надлежните институции на Република Бугарија, донесоа нова одлука за влез во Бугарија на нашите државјани. Поради влошената епидемиолошка ситуација, Северна Македонија продолжува да биде во т.н. Црвена зона, но со најновата одлука се укинуваат ограничувањата за влез за неесенцијални потреби.
Најновата одлука на бугарските власти, ќе стапи на сила од 20 јануари Претходната одлука за забранет влез на сите државјани требаше да стапи на сила од 19 јануари.