МНР за изјавата на Дачиќ: Македонија и Србија имаат многу блиски и длабоки пријателски односи

Добивај вести на Viber

По вчерашната изјава на шефот на српската дипломатија, Ивица Дачиќ дека Србија згрешила што ја признала Македонија под нејзиното уставно име, денеска пристигна реакција од македонското МНР. 

Во реакцијата на МНР се вели дека меѓу Македонија и Србија има многу блиски и длабоки пријателски односи и не е случајно што граѓаните во двете земји имаат многу позитивни чувства за соседите од другата страна. 

„На политичарите им останува само да ги продлабочуваат тие историски односи, доколку тоа не е возможно тогаш треба да бидат одговорни барем да не го рушат пријателството кое постои меѓу Македонија и Србија во двата правци. Ова треба да важи и во услови кога е очигледно дека се загрева атмосферата за следното гласање за влез на Косово во УНЕСКО“ - велат од МНР.  

Дачиќ кажа дека Србија ќе води политика на реципроцитет, но тоа не значи дека нешто билатерално ќе преземе против тие земји. Додаде и дека Белград во билатералните односи со Скопје и понатаму ќе го користи уставното име на Македонија, но дека мултилатерално ќе го користи името кое се употребува во ЕУ и Обединети нации – БЈРМ.

Во интервју за „Бета“, Дачиќ вели дека тоа не е одмазда за нашето признавање на Косово и поддршката за неговото членство во УНЕСКО, туку одговорна државна и национална политика.