МОН го демантира Милошоски: Законот за дигитални учебници не е повлечен поради реакциите на јавноста

Добивај вести на Viber

Министерството за образование го демантира пратеникот Антонијо Милошоски дека Предлог-законот за учебници и и други наставни и дидактички материјали во основно и средно образование, кој предизвика поделени мислења во јавноста, е повлечен од собраниската процедура поради негативни реакции во јавноста.

„Груба манипулација со граѓаните и родителите е информацијата пласирана од пратеник од опозицијата дека под притисок на јавноста го повлекуваме новиот закон за учебници од собраниска процедура. Министерството за образование и наука не се откажува од носењето на целосно нов закон за учебници со кој се воведуваат современи материјали за учење и се нуди можност за дигитализација. Во интерес на објективно и вистинито информирање на јавноста, по координација со Секретаријатот за европски прашања, предлог законот е вратен за да се дополни, само делот за усогласување со европските документи, како дел од процесот на усогласување на националното со европското законодавство. Законот денес е на дневен ред Влада, по што ќе биде доставен до Собрание“, демантираат од МОН.

Наспроти демантот на министерството, пратеникот на ВМРО-ДПМНЕ претпладнето објави дека предлог-законот е повлечен поради реакциите во јавноста.

„Информација: После силните реакции од јавноста, од собраниска процедура вчера е повлечен Предлог-законот за учебници и други наставни и дидактички материјали во основно и средно образование“, објави пратеникот на ВМРО-ДПМНЕ.

Овој закон предвидува ипотреба на дигитални учебници, наместо печатени, по што дел од јавноста реагираше со жестока критика.  Според министерството за образование, станува збор за реформа која од есен ќе стартува во прво и четврто одделение.