„Мост“ регистрираше нерегуларности, тврдат дека имаат докази

Добивај вести на Viber

Граѓанската асоцијација „Мост“, за периодот од 15 октомври до 20 ноември забележала непочитување на одвојувањето на државата и на партијата, притисоци врз јавниот сектор, притисоци за гласање и злоупотреба на јавни ресурси.

Оттаму велат дека обезбедиле докази за десет случаи за нерегуларности од изборниот процес, од јавно достапни информации и од набљудувачи. Од „Мост“ додаваат дека има индиции за кривични дела и дека доказите ќе ги достават до Комисијата за следење на изборни нерегуларности. За ова  е предвидена казна затвор во траење од шест месеци до една година.

„Има 41 случај на притисоци врз вработените во јавниот сектор да посетуваат партиски митинзи на владејачката партија. Во седум случаи во пет општини има притисоци за гласање или обезбедување гласачи за владејачката партија, а во седум случаи во шест општини забележавме употреба на службени возила за партиски цели“ – вели директорот на „Мост“,  Дарко Алексов.

„Мост“ на терен има 80 долгорочни набљудувачи, а досега добиле 2.025 извештаи.

Апелираат до граѓаните да ги пријават сите нерегуларности на бесплатниот телефонски број 080 080 080 или лично во просториите на „Мост“.