МПЦ: На овој Велигден храм нека бидат нашите срца во кои ќе воскресне Христос!

Добивај вести на Viber

Воскресението Христово да се пречека и празнува со најблиските во домашната црква – во семејството, повикаа од Светиот архиерејски синод (САС) на Македонската православна црква – Охридска архиепископија (МПЦ-ОА).

Ваквото славање е неопходно поради пандемијата на коронавирусот. 

„На овој Велигден храм нека бидат нашите срца во кои ќе воскресне Христос! На воскресните свети Литургии свештенослужителите ќе се молат за сите. Вие, пак, коишто од оправдани причини ќе отсуствувате, од вашите домови смирено и достоинствено изразувајте ја вашата вера и со радост придружете се во пеењето на воскресната химна: „Христос воскресна од мртвите…“ Сите да ги почитуваме најдобронамерните препораки на надлежните за доброто на сите! Воскреснатиот Христос нека ја исцели секоја човечка немоќ, а воскресенската радост нека ни биде постојана!, се наведува во соопштението од Канцеларијата на САС на МПЦ-ОА.

И премиерот Оливер Спасовски деновиве нагласи дека за Велигден треба да седиме дома. 

Претседателот на државата Стево Пендаровски денеска даде пример дека во светот, се затворени многу значајни верски објекти токму поради пандемијата. Рече дека ниту еден верник не е поважен од некој атеист или обратно.

Од утре од 16 часот, до 5 часот наутро во вторник, Македонија ќе биде во карантин.

Цели 85 часа земјата ќе биде во карантин.

Во Македонија бројот на потврдени случаи на коронавирус е над 1.000.

Денеска е Велики четврток, верниците заминаа во црквите, но мораа да држат дистанца.