На граѓаните не „им се чуе“ за апелите на Димитров: Министерот револтиран поради патувањата

Добивај вести на Viber

Изгледа апелите да се седи дома, посебно да не се патува во странство се залудни. Така барем може да се заклучи од статусот на шефот на дипломатијата Никола Димитров кој преку социјалните мрежи ги искритикува граѓаните и покажа дека е револтиран од непослушноста.

Министерот Димитров во Фејсбук статус наведува дека од од понеделникот напладне па до утрото во вторникот, вкупно 1331 лице заминале од земјава.

-Имам чувство дека ситуацијата е недоволно јасна во регионот, Европа и во светот. Не сакам да навегувам воопшто во мотивите за патувањата кои можеби биле непоходни но сепак морам да предупредам на ситуацијата која е алармантна-пишува Димитров.

Димитров револтирано потсети и за заглавените граѓани по аеродромите ширум светот, со откажани летови бидејќи некоја земја ги затворила границите за странски државјани. Потсети на сите оние граѓани кои со автомобили се заглавени во колони во Словенија, во Австрија, во Хрватска.

„Пуштаме дипломатски ноти со лични податоци на нашите граѓани врз основа на нивните телефонски разговори со кризниот тим во МНР. Некои конзуларни барања успеваат, некои не. Ние имаме контрола само врз своите, македонските граници. Ние не ги контролираме границите на други држави“, посочува Димитров.

Тој посочува и дека надлежните не можат да гарантираат дека оние кои заминале ќе може да се вратат дома кога посакаат, а секое патување е ризик за здравјето на самите оние кои патуваат но и за нивното семејство и целата нација.