На Украина ќе и требаат уште милијарди

Добивај вести на Viber

На украинската економија веројатно ќе и бидат потребни милијарди долари дополнителна помош доколку конфликтот во оваа земја продолжи и во следната година, предупреди ММФ. Според Фондот, само за покривање на недостатоците во резервите на централната банка ќе бидат потребни 19 милијарди долари до крајот на 2015 година. Дури и доколку судирите се намалат во следните месеци, економијата на Украина ќе потоне за 6,5% годинава со минимален раст следната година, наведува ММФ. Аналитичарите веруваат дека штетата нанесена на украинската економија ќе биде и значително пповисока. „Завршување на конфликтот не е на повидок, па речиси е невозможно да се прават прогнози. Овогодишната рецесија ќе биде длабока, можеби и до минус осум проценти, а и следната година нема да дојде до заздравување“, вели претседателот на Одделот за истражување на пазарите во развој во лондонската банка „Стандард Чартерд“ Тимоти Еш. ММФ, кој на Украина во март и одобри пакет помош вреден 17 милијарди долари, наведува дека закана за економијата на таа земја, освен судирите, претставуваат и ризиците од нерешениот спор со Русија околу цената на гасот и долговите за претходните испораки на гас. Во замена за парите од пакетот помош од ММФ, Украина мора да ја намали јавната потрошувачка и да помине низ болни реформи, што е тешка задача за секоја влада, дури и за оние кои не се во војна. Доколку борбите не престанат, ќе биде потребна нова стратегија, која ќе вклучува значително поголема финансиска помош, проценува ММФ. Фондот наведува дека зголемената потрошувачка на Киев за одбрана, поддршка на банките и државната енергетска компанија Нафтогас ќе доведат до поголем од очекуваниот буџетски дефицит, па владата ќе мора да ја намалува потрошувачката уште повеќе во следните години.