Како беше создадена Алфа телевизија, новиот национален концесионер?

Добивај вести на Viber

Советот за радиодифузија пресече,  новата национална ТВ концесија ќе ја добие телевизија Алфа.  Со ова, Алфа доби дозвола да прекине со емитувањето преку сателит и да добие одобрување за вршење радиодифузна дејност на национално ниво. Со ова  Алфа, практично доаѓа на местото на концесијата која до пред две годинија ја имаше А1 Телевизија, која се до нејзиното затварање беше најгледана и најпопуларна телевизија во Македонија. За концесијата конкурирале и Канал 77 од Штип, кој медиум наместо концесија за работа на државно ниво доби укажување „да го усогласи работењето бидејќи е констатирана недозволена медиумска концентрација“. Како настана Алфа телевизија? Телевизијата од своето основање во 90-тите години беше локална скопска телевизија која го носеше името ТВ Скопје. Потоа беше купена од страна на познатиот грчки медиумски магнат Димитрис Кондоминас. Поради тоа што телевизијата не доби национална концесија, Грците набрзо ја продадоа телевизијата, со што нови сопственици постанаа Французи, но и тие немаа успех со работата на телевизијата. Во 2008 сопственик стана познатиот македонски бизнисмен Штерјо Наков, а зделката била вредна половина милион евра, пишува Википедија. Неодамна повторно се смени сопственичката структура на телевизијата. Како нов сопственик на телевизијата се наведува српскиот бизнисмен Веселин Јевросимовиќ кој го откупи мнозинкиот пакет акции од Фершпед. Алфа е една од телевизиите која процесот на дигитализација на телевизискиот сигнал во Република Македонија го дочека целосно подготвена. Во неа работат околу 150 луѓе од најразлични категории и како што објави телевизијата тие „ги остваруваат заложбите на менаџментот на телевизијата за најдобра телевизиска понуда на пазарот’. Алфа исто така е телевизијата која во текот на последната предизборна кампања заработи најмногу пари помеѓу останатите телевизии, односно вкупно 191 илјади евра од рекламирањето на партиите.