Нафтата поскапе, намалени залихите во САД
Објавено во: Економија 21 Мај, 2015
Цените на нафтата во текот на денешното тргување во Азија се зголемија, благодарение на падот на залихите на американската лесна нафта, кој поттикна надеж дека глобалните залихи на тој енергент ќе бидат намалени, наведуваат аналитичарите.
Aмериканската „лесна“ нафта (WTI) за испорака во јули поскапе на Њујоршката берза 22 центи на 59,20 долари, додека нафтата од типот „брент“ за јулската испорака во Лондон поскапе 32 центи на 65,35 долари.
WTI вчера поскапе 99 центи, а „брент“ 1,01 долари, откако најновиот извештај за залихите на нафта во САД покажа дека тие се намалени повеќе отколку што се очекуваше.
Американското Министерство за енергетика соопшти дека залихите на комерцијална нафта паднале за 2,7 милиони барели во неделата заклучно со 15 мај, додека аналитичарите кои ги анкетирал „Блумберг“ очекувале пад од 1,75 милиони барели. Покрај тоа, дневното производство на нафта истовремено е намалено за 112.000 барели на 9,26 милиони барели, после растот од 5.000 барели од претходната недела.
Аналитичарите и инвеститори исто така ги следат напорите на Обединетите нации да покренат политички преговори во Јемен , во време кога растат стравувањата дека немирите од Јемен би можеле да се префрлат и на соседните земји, Саудиска Арабија и Иран, кои се големи произведувачи на нафта.