НАДОЈДЕНИОТ ДУНАВ СТИГНА ВО ХРВАТСКА: Се очекува дека нивото нема да достигне осум метри
Објавено во: Балкан 25 Септември, 2024
На границата меѓу Унгарија и Хрватска, во близина на Батина на исток од земјата, нивото на водата во Дунав е измерено на 708 сантиметри.
Томислав Новосел од водостопанската компанија „Хрватске вода“ изјави дека врвот на поплавниот бран стигнал во Хрватска во два по полноќ.
Новосел изрази уверување дека нивото на водата сигурно нема да достигне осум метри и додаде дека во наредните часови се очекува стагнација, а потоа и благо намалување.
Врвот на поплавниот бран на Дунав порано стигна до Унгарија, а реката веќе се повлекува, соопшти денеска претставник на унгарското МВР.
Иако нивото на водата се намалува, акциите за заштита од поплави се во тек во 70 области во Унгарија. Предупредувањето за поплави ќе важи до сабота попладне.
Најмалку 23 луѓе загинаа во поплавите минатата недела во повеќе европски држави.