Најголемата европска банка HSBC отпушта 25 илјади вработени
Објавено во: Економија 09 Јуни, 2015
Британската банка HSBC, која во овој момент е погодена од бројни скандали, најави дека денес ќе отпушти 25 000 работници, во рамки на глобалното реструктурирање на работата со кое е предвидено и повлекување на банките од Бразил и Турција, како и можноста за напуштање на Лондон како седиште на банката.
Банката, исто така, соопштила дека за наредните две години е планирана годишна заштеда од пет милијарди долари.
Соопштението на HSBC доаѓа пред денешното обраќање на генералниот директор на банката Стјуарт Гуливер пред инвеститорите и очекуваната најава за укинување на повеќе илјади работни места.
„HSBC во овој момент презема големо реорганизирање на своето работно портфолио. Банката прераспределува ресурси како би ја фатила шансата за иден раст и со структурни промени се прилагодува на бизнис климата“, се наведува во официјалното соопштение на банката.
HSBC планира до 2017 година да оствари годишна заштеда на трошоци од 4,5 до 5,0 милијарди долари, како и да го продаде својот бизнис во Турција и Бразил, се прецизира во соопштението, и додава дека банката ќе го зголеми обемот на инвестиции во Азија.
Банката, исто така, најавила завршеток на изработката на извештај за локацијата на која до крајот на оваа година ќе го премести своето седиште.