Намалена потрошувачката на електрична енергија за време на енергетската кризна состојба
Објавено во: Економија 16 Декември, 2021
Во услови на прогласена енергетска кризна состојба и ценовниот шок на слободниот пазар на електрична енергија, вкупната потрошувачка на струја во Македонија се намалила за 4,6 отсто.
Ова го покажува споредбата на вкупната потрошувачка, според податоците од националниот систем-оператор МЕПСО од 9 ноември до 9 декември, период за кој првично важеше уредбата за прогласување на кризна состојба во енергетиката, споредено со истите календарски денови лани.
Во овој период биле потрошени 689.847 мегаватчасови вкупен конзум, што е за 28.282 мегавати помалку од 9 ноември до 9 декември 2020 кога биле потрошени 718.129 мегаватчасови струја во земјата.
Инаку во пандемиската 2020, според податоците на Регулаторната комисија за енергетика, вкупната потрошувачка изнесувала 7,46 милиони мегаватчасови и била потрошена само 0,33 отсто помалку струја во однос на 2019, а за 0,91 процент повеќе од 2018.
Во меѓувреме Собранието ја прифати предлог одлуката за продолжување на рокот за постоење на кризна состојба на целата територија заради недостиг на електрична енергија и состојбите на пазарите на електрична енергија до 9 јуни.
Во моментов нема прецизни проекции колку ќе ја чини државата ваквата потрошувачка особено со вбризгувањето буџетски средства директно во енергетските компании ЕСМ и МЕПСО за да се зголеми нивната ликвидност.
Уредбата на Владата отвораѓе можност и за воведување на одредени рестриции, но до таква мерка, барем засега, не се предвидуваше.
Колку пари ќе бидат потребни, засега никој точно не прецизира, но речиси сигурно ќе бидат повеќе од оние 65 милиони евра кои Владата ги издвои од буџетот.