Наскоро отворени врати на најголемиот трговски центар во западна Македонија

Добивај вести на Viber

При крај е  изградбата на трговскиот центар „Палма мол“, кој ќе биде најголемиот шопинг-центар во полошкиот регион. Kако инвеститор на овој проект, со инвестиција од над 20 милиони евра, се јавува фирмата „Палма трејд“, која на пазарот постои повеќе од 20 години и е дистрибутер на производи од за широка потрошувачка и бела техника. -Трговскиот центар ќе претставува вистински двигател на економијата во полошкиот регион, а свој придонес ќе има од повеќе аспекти. Имено, шопинг-центарот ќе вработи околу 400 луѓе, а во неговата изградба, како и во опремувањето на надворешноста, внатрешноста и локалите, учествуваат исклучиво македонски компании” - вели Оливер Димитровски, сопственик на агенцијата за недвижности „New Way“. Иако и сега има посетители, Димитровски очекува дека по целосното отворање, бројката ќе достигне од 10.000 до 15.000 посетители дневно. Трговскиот центар „Палма Mол“ се наоѓа на самиот влез на Тетово на само еден километар од центарот на градот, а отспротива се наоѓа клучката која патот од Тетово го води до Гостивар кон Охрид и Струга. Центарот се состои од четири нивоа (подрум, приземје, први и втори кат), со површина од 32.000 квадратни метри или 8.000 квадратни метри на ниво. Површината на локалите за изнајмување изнесува 16.500 квадратни метри. Меѓу нив е и супермаркетот на „Рамстор“ со вкупна површина од 2.200 квадратни метри. Покрај тоа, во „Палма Mол“ ќе бидат застапени и брендовите: „Палма трејд“, “Њујоркер“, ДМ, ресторан „Емпориум“, „Спорт вижн“, „Мотиви“, „Тудорс“, „Пенти“, „Шатце парфимерии“, „Просветно дело“ и други. Kако што вели Димитровски, Трговскиот центар располага со отворен и затворен паркинг, за близу 500 возила, што го прави најголемиот бесплатен паркинг-простор во Македонија. Внатрешниот дизајн го направи архитектонско студио ДСЦ „Дизајн“, има одлична поврзаност на катовите, 10 ескалатори, панорамски лифт, два големи товарни лифта и две подвижни ленти преку кои подземниот паркинг се поврзува со приземјето. “Шопинг-центарот „Палма Mол“ е во завршна градежна фаза, а бројот на слободни локали е многу мал. Исто така, особено нe радува што успеавме да понудиме цени кои се максимално пристојни и конкурентни на пазарот. Со задоволство ги очекуваме сите што се во можност да дојдат и да нe посетат на големото отворање кое ќе биде наскоро” - додава Димитровски.