НБРМ донесе одлуки со кои се менува концептот за снабдување со готовина

Добивај вести на Viber

Осмата седница на Народна банка донесе три одлуки поврзани со условите и начинот за снабдување, замена и проверка на автентичноста на книжните и кованите пари.

„Со овие одлуки се менува концептот за снабдување со готовина, при што, покрај досегашните учесници во циклусот на движење на готовината - банките, се предвидува и можноста за вклучување други правни субјекти, центри за готовина, како дополнителна алка во синџирот на дистрибуција и операции со готовина. Ваквата измена на регулативата, всушност претставува децентрализирање на досегашниот модел на снабдување со готовина, со што  се овозможува и вклучување на небанкарскиот сектор во процесот на снабдување со готовина и поттикнување и создавање конкурентни услови на пазарот за обезбедување готовински услуги.

Одлуката за начинот и условите за замена на книжните и кованите пари што станале несоодветни за оптек ги пропишува критериумите за препознавање и селектирање на книжните и на кованите пари и примена на утврдената постапка за замена на парите кои се идентификувани како несоодветни за оптек при обработката, од страна на учесниците во реорганизираниот модел за снабдување со готовина“, велат од НБРМ .

Според оваа нова одлука би се добил рамноправен третман со банките во сите сегменти од доменот на готовинските операции.

Новиот пакет на подзаконски акти од областа на готовинското работење има директни импликации за донесување на Одлуката за дополнување на Одлуката за единствената тарифа на надоместоците за услугите што ги врши Народната банка на Република Македонија, во делот кој ја регулира обврската за плаќање на надоместок на издадената готовина на банките и центрите за готовина, како директни учесници во реорганизираниот систем на готовинско работење.

Советот ја донесе и Програмата за истражувачката активност во периодот 2016-2018 година. Истражувањата предвидени за тригодишниот период треба да  дадат поддршка на процесот на одлучување, да придонесат за поуспешно функционирање на Народната банка и за соочување со идните предизвици. Воедно, предвидените истражувања и анализи треба да придонесат кон натамошно осовременување на работењето на Народната банка и подготовка за идното учество во Европскиот систем на централни банки (ЕСЦБ).

На денешната седница Советот на Народната банка на Република Македонија, врз основа на предвидениот распоред и динамика на активностите, ја усвои Одлуката за издавање и Одлуката за пуштање во оптек на кованата пара за колекционерски цели „Владимир’’ од серијата „Ден на Ангел’’. Оваа кована пара е со апоен од 100 денари во количина од 5000 парчиња.

Советот разгледа и други прашања од својата надлежност.