НЕ ГИ ПРИФАТИВМЕ ПОНУДЕНИТЕ 12 ОТСТО, ПРОТЕСТИТЕ ПРЕД СОНК СЕ ОБИД ДА ГО ОСЛАБАТ СИНДИКАТОТ: Неделков најави продолжување на разговорите

Добивај вести на Viber

За денеска е закажана првата средба со медијаторот кој вчера беше назначен од страна на Министерството за труд и социјална политика, најави претседателот на СОНК, Јаким Неделков, кој на денешната прес конференција истакна дека не ги прифатиле понудените 12 отсто за зголемување на платите.

Тоа што денеска продолжи наставниот процес не значи дека сме ги прифатиле понудените 12 проценти. Ние не прифативме ништо затоа што така одлучи членството на СОНК и на некој начин повторно се наоѓаме на почеток на преговорите. Со помош на овластен помирувач ќе се обидеме да ги добиеме бараните 18,4 проценти зголемување на платата, нов колективен договор и континуирано зголемување на платите за 2023 и 2024 година, изјави Неделков.

Тој го оцени вчерашниот протест на дел од членството како обид да се ослабат позициите на синдикатот.

Просветните работници кои вчера се собраа на протест пред седиштето на СОНК, според Неделков, се најверојатно изманипулирани или неинформирани.

– Вакви неидентификувани собирања каде не знаеме кој е организатор, ниту која е целта, не води кон ништо и веројатно тоа е добар обид за ослабување на позициите на СОНК, разбивање на единството на СОНК, кое на крајот на денот ќе биде желба за секој којшто му пречи СОНК да биде единствениот и најсилен синдикат во државата. Од тука треба да се почне – која е целта на ваквите жестоки реакции, рече Неделков на денешната прес-конференција.

Тој најави дека ваквите собирања нема да го поколебаат да работи според закон и да се залага за правата на работниците.

– Досега сме имале многу штрајкови и секогаш сме излегувале со резултати, меѓутоа вакво т.н. спонтано собирање на двапати не личи на просветни работници. Јас на секому ќе му се извинам ако го навредам, меѓутоа ваквото однесување не води кон ништо. Секој нека биде свесен дека мене нема да ме поколеба да работам согласно закон, да градам партнерски однос и да се залагам за правата на работниците, рече Неделков.

Од СОНК упатија апел до членството да не потпаѓа на дезинформации и уверуваат дека одлуката да се стави штрајкот во мирување е согласно закон.