Добивај вести на Viber
Агенцијата за храна и ветеринарство повлекла од продажба 5.000 јајца кои биле несоодветно обележани и небезбедни за јадење. Од Агенцијата не сакаа да коментираат ниту за марката на јајцата ниту за компанија се работи, иако на упатените во овој бизнис им е познато името на компанијата. Алсат-М објави дека станува збор за јајца под брендот „Супер јајце – пакинг“ произведени на фарма во Србија, а увезени од компанија од Кавадарци. Јајцата се пронајдени во два поголеми маркети, а инспекторите извршиле контрола по поднесена пријава од потрошувач. Од Агенцијата велат дека сите 5.000 јајца се повлечени и уништени.
-Во мај е поднесена претставка од потрошувач во која потрошувачот се сомнева во означувањето и безбедноста на конзумни јајца затекнати во промет, Агенцијата за храна и ветеринарство веднаш изврши вонредна контрола на пазарот и прометот со конзумни јајца, при што беше констатирано следново: Од промет беа повлечени околу 5.000 конзумни јајца поради несоодветно означување и истите како потенцијално небезбедни под надзор на официјален ветеринар се уништени. Согласно Законот за безбедност на храната против операторот поднесена е прекршочна пријава и изречена е глоба во износ од 5000 евра за правното лице и 500 евра за одговорното во правното лице во денарска противвредност,
велат за Фактор од Агенцијата за храна и ветеринарство.