Неколку факти за Дарко Каевски кој ќе ја води Агенцијата за млади и спорт

Добивај вести на Viber

Дарко Каевски со одлука на Владата на Република Македонија ќе биде новиот директор на Агенцијата за млади и спорт откако на функцијата беше разрешен Марјан Спасевски, кадар на претходното владино раководство.

Новиот директор е роден во 1989-та година, а е дипломиран економист со искуство во приватниот и државниот сектор. Тој претходно беше советник во општина Кисела Вода и интересно е што неговиот претходник Спасевски токму во истата општина беше некогаш дел од одделот за односи со јавност.

Во објавената биографија за Дарко Каевски се наведува дека активно се залагал за правата на младите со учество на неколку форуми и тренинзи во организација на светски познати институти како што се, ИРИ – Интернационалниот Републикански Институт, Моментум од Велика Британија, Фридрих Еберт од Германија, кадешто професионално се надградува и разменува знаења и искуства поврзани со младинските политики.

Од 2014 година како потпретседател на СДММ, Дарко Каевски ја застапува oорганизацијата како полноправен член во рамки на Националниот Младински Совет на Македонија.

Каевски ќе раководи со агенцијата која директно учествува во финансиската помош на спортските федерации и асоцијации во Македонија, помага за организирање на спортски настани и доделува спортски стипендии.

Досега најпознат директор на Агенцијата за млади и спорт е Диме Спасов кој стигна до министерска позиција, но неславно ја заврши политичката кариера со бегството од местото на направена сообраќајна несреќа.