Добивај вести на Viber
Проектот „Луково Поле“ нема да се гради без согласност од Тирана, ветиле македонските министри за економија и животна средина Ваљон Сарачини и Абдулаќим Адеми пред албанскиот премиер Еди Рама.
„Нема да преземеме ниту еден чекор без да ги консултираме соседите, затоа што тоа го бараат меѓународните конвенции“, рекол Адеми. Сарачини објаснувал дека Македонија се уште не побарала официјална дозвола од Албанија за проектот, бидејќи тој се уште е само идеја на хартија.Финалната студија ќе била готова во јуни, а таа ќе вклучувала и проценка на ризиците врз животната средина.
Рама ги повика македонските министри на разговори за проектот за изградба на хидроцентрала во близина на македонско-албанската граница, против кој протестираа граѓанските здруженија во повеќе албански градови. Особено реакции предизвика најавата дека проектот вклучува пренасочување на текот на реката Радика.
На средбата било договорено да се формира заедничка албанско-македонска група што ќе соработува на техничко ниво, која ќе најде решение што ќе биде во интерес на двете земји.
Претходникот на Рама, Сали Бериша тврди дека меѓу двете соседни држави веќе има договор за реализација на овој проект, но сегашниот албански премиер тоа го негира.
„Ниту еден проект нема да им ја одземе реката Радика на Албанците“, рекол Рама, порачувајќи дека Албанците полесно ќе поверуваат „дека Бериша е покомичен од Мистер Бин отколку дека е поголем патриот од Али Ахмети“.