Нема нов договор или анекс на договорот со Бугарија, информира МНР

Добивај вести на Viber

Министерството за надворешни работи(МНР) демантира дека има нов договор или анекс на веќе постоечкиот Договор за пријателство со Бугарија. 

Од МНР велат дека овие шпекулации се контрапродуктивни на напорите на двете држави за надминување на меѓусебните разлики.

„Односите меѓу Република Северна Македонија и Република Бугарија продолжуваат да се развиваат согласно Договорот за пријателство, добрососедство и соработка. Во тие рамки, се преземаат сите потребни активности и ангажмани кои се во согласност со овој Договор, а кои пред сѐ имаат за цел продлабочување и интензивирање на билатералната соработка. Во тој контекст, е и најновата иницијатива за организирање на претстојна средба на ниво на шефови на Влада, како прв чекор за унапредување на соработката меѓу двете нови влади, внесување на нова динамика во проектите и активностите, а што е од интерес како за двете држави така и за перспективата и безбедноста на Регионот и на Европа. Министерството за надворешни работи цени дека пред објавувањето на вакви чувствителни информации, нивна првична проверка со Министерството ќе придонесе за поквалитетно информирање на граѓаните, но ќе значи и придонес во насока на поддршка на обидите за надминување на отворените прашања со нашиот сосед Бугарија“, додаваат од МНР. 

Инаку, што се однесува до македонско - бугарските односи. посетата на премиерот Кирил Петков на Скопје се одложува, изјавија за БНТ од прес-центарот на Советот на министри. Сепак не се прецизира кога тој ќе ја посети Македонија. 

Претходно, Министерскиот совет за БНТ потврди дека Кирил Петков и шефицата на неговиот кабинет Лена Бориславова ќе бидат во изолација во наредните денови.