НЕМА ПРЕОПТОВАРУВАЊЕ НА ЗДРАВСТВЕНИОТ СИСТЕМ: Бројот на заразени со Ковид 19 се зголемува линеарно

Добивај вести на Viber

Првиот регистриран случај на заразен пациент со коронавирусот во земјава беше пред повеќе од месец дена и досега вкупната бројка е 259 случаи. Истовремено, бројот на излекувани е три, а починаа шест луѓе. Здравствените власти сметаат дека  зголемувањето на бројот на пациенти со Ковид 19 е очекуван, но смета дека е добро е што бројот на случаи се зголемува линеарно, па во моментов има доволен капацитет да се примат сите пациенти.

– Добро е што бројот на случаи се зголемува линеарно, а не експоненцијално, што значи дека секој ден имаме приближно еднакво зголемување, што се уште му дава шанса на нашиот систем за одржливост и можност соодветно да ги прими и амортизира сите пациенти без притоа да бидат пренатрупани нашите капацитети, рече министерот здравство Вено Филипче на вчерашната прес-конференција.

Сепак, нагласи министерот дека се уште сме во една форма на војна против Ковид-19, зошто според него престои најтешкиот период во кој се очекува бројот на заболени и на починати да расте.

– За ова сите мораме да бидеме свесни. Имаме и еден млад човек кој почина. Ова е доказ дека вирусот не штеди никој, никој не е имун, ниту заштитен од него. Стануваше збор за најтешката можна форма на клиничка манифестација на оваа болест, рече Филипче, информирајќи за досега најмладиот починат пациент – 31 годишен маж.

Според последните информации на Инфективната клиника во Скопје има вкупно 49 пациенти. Министерот информираше дека седум имаат потешка клиничка слика, односно – пневмонија, истовремено нагласувајќи дека нема пациенти кои се ставени на респираторни апарати.