Несудениот МВР Ковачки ја обвини Шекеринска за објавување на класифицирана мапа
Објавено во: Македонија 27 Мај, 2020
Полковникот Драган Ковачки, инаку несуден министер за внатрешни работи на Македонија, ја обвини министерката за одбрана Радмила Шекеринска дека во јавноста, односно на Фејсбук, објавила како што вели тој, класифицирана воена мапа.
„Радмила Шекеринска направи кривично дело казниво со затвор и изврши класичен упад во воениот систем на Република Македонија со објавувањето на интернет на мапата за зоната на одговорност на Третиот пешадиски батаљон, мапа која открива дел од позициите на тој батаљон“, објави канидатот за пратеник од редовите на ВМРО-ДПМНЕ.
Според офицерот, мапата содржи класифицирани работи и дека изработувачот на актот го има изработено ова како степен на доверливост. Вели дека мапата се уште стои на Фејсбук страницата и покрај неговото инсистирање кон вицепремиерката да се отстрани мапата. Поради тоа што станува збор за кривично дело казниво со казна затвор, вели Ковачки, мапата не смее ниту да се фотографира, а камоли да се објавува во јавност.
„Било кој да го направи истото ќе му биде покрената дисциплинска постапка, и ќе му биде одземен безбедносниот сертификат и ќе му биде покрената кривична постапка, без разлика дали станува збор за министер сите ние мора да ги почитуваме законите“ вели Ковачки.
Тој во декември беше предлог на опозицијата да биде технички министер за внатрешни работи на местото на Оливер Спасовски, но власта не го прифати тоа бидејќи стануваше збор за униформирано лице. Наместо Ковачки, Наќе Чулев беше поставен на таа функција подоцна.