Незаконски ловеле риба во преспанско и ја препродавале по пазари

Добивај вести на Viber

Државниот инспекторат за земјоделство по сознанија за организиран криволов на риба на Преспанското Езеро во акција заплени поголемо количество опрема за криволов на риба.

При акцијата во соработка со Единицата за брзи интервенции при МВР со судски налог извршени биле претреси на објекти и домови на одредени лица во реонот на Преспанското Езеро, при што на потегот на селата Деолно Дупени и Наколец биле пронајдени и запленети 283 рибарски мрежи во вкупна должина од околу 14 километри, 205 килограми риба  и тоа претежно преспанска плашица, две сачми, една повлечна мрежа – влак, шест вонбродски мотори за чамец, три кајчиња и друга опрема за риболов.

Според инспекторатот додека езерото е без концесионер, организирана група физички лица од регионот на Преспа со значајни количества риболовен алат, мрежи, недозволени средства, влакови, оски, харпуни, вршеле нелегален излов на риба од Преспанското Езеро. Исто така, сознанијата на инспекторатот биле дека истите лица поседувале импровизирани складишта за риболовен алат, како и фрижидери со свежа и замрзната риба што илегално била пуштана во промет на зелените пазари во Битола, Прилеп и Ресен, како и во угостителските објекти во Охрид и Струга.

СВР – Битола  поднело пет кривични пријави, додека исто толку прекршочни пријави се поднесени против други пет лица од страна на Државниот инспекторат за земјоделство. Една пријава е поднесена против непознат сторител. Целата запленета опрема и алат ќе биде предаден на Агенцијата за одземен имот од Скопје.