Никола Димитров се откажа од тужбите за „Рекет“
Објавено во: Македонија 19 Септември, 2019
Бикола Димитров, министерот за надворешни работи, објави дека се откажува од намерата да ги тужи порталите „Инфомакс“ и „Република“, кои го поврзаа со случајот „Рекет“.
Според шефот на македонската дипломатија, доволна била сатисфакцијата што Советот за етика во медиумите донела одлука против двата електронски медиуми во која се вели дека тие го вмешале Димитров во „Рекет“ без ниту еден аргумент и со неточни информации со цел да го дискредитираат.
„Во моментот кога ги видов текстовите, згрозен од дрскоста моето име да се плетка во случај со кој немам никаква, ама апсолутно никаква врска, а чија разрешница е исклучително битна за земјава, кажав дека правда ќе побарам на суд. Но, следејќи ги добрите европски практики и слушајќи ги апелите на новинарските организации, особено во контекст на најавените чекори за силна саморегулација на интернет просторот, сепак се одлучив да ги поддржам професионалните новинари и нивните обиди за воспоставување на ред во сопствениот двор. Јас имам мисија и немам време за секојдневни тужби. За волја на вистината, уште помалку тоа време и приоритети ги има во моментов македонското судство“, објави Димитров на својот профил на Фејсбук.
Димитров и синоќа во врска со случајот „Рекет” во телевизискиот дуел со потпретседателот на ВМРО-ДПМНЕ, Александар Николоски, беше дециден дека воопшто не е инволвиран. „Обидот со лаги да ме извалкате или да ме ‘пикате’ во ‘Рекет’ е безобразен. Милиметар немам со таа приказна. Планината што доаѓа по датумот за преговори е токму да се справиме со оваа грозна спрега на подземјето. Тоа што излезе од бомбите го немаме сериозно чепнато, а треба и ќе има одговорност”, му рече Димитров на Николоски.